غلام ہمارے فیصلے کریں گے تو ہم بھی غلام ہی رہیں گے: علی امین

لاہور: وزیراعلیٰ خیبرپختونخوا علی امین گنڈا پور کا کہنا ہے صوبے میں کرپشن پر کنٹرول کر لیا ہے، کے پی سب سے امیر صوبہ ہے۔

لاہور ہائیکورٹ بار میں خطاب کرتے ہوئے وزیر اعلیٰ کے پی کا کہنا تھا مدینہ کی ریاست انصاف پر قائم تھی، 2024 کے انتخابات میں بدترین دھاندلی کی گئی، اپنے لوگوں کو لانے اور عوام پر مسلط کرنے کے لیے تجربے کیے گئے، ملک میں آئین کوتوڑ کرمارشل لا لگایا گیا۔

علی امین گنڈاپور کا کہنا تھا ملک کو ڈنڈے کے زور پر نہیں چلایا جا سکتا، فیصلہ سازوں کو لیڈرز نہیں غلام چاہئیں، غلام ہمارے فیصلے کریں گے تو ہم بھی غلام ہی رہیں گے۔

انہوں نے کہا کہ بانی پی ٹی آئی نے کہا ہے وہ ملک کی خاطرمذاکرات کے لیے تیار ہیں، بانی پی ٹی آئی کا مقصد اقتدار کا حصول نہیں، ہم پرتشدد کیا گیا، ہمارا لیڈر اس کی بیوی اور ہمارے کارکن جیلوں میں ہیں، ہمارے 14 لوگوں کوشہید کیا گیا۔

علی امین گنڈا پور کا کہنا تھا ہمارے پاس بہت پیسہ ہے ہم نے کرپشن پر کنٹرول کر لیا ہے، ہم نے بہت پیسا جمع کر لیا ہے، خیبر پختونخوا امیر ترین صوبہ ہے۔

About The Author

Muhammad Soomro

See author's posts